CENTURIE V
I.
Avant venuë de ruine Celtique,
Dedans le temple deux palementeront,
Poignard coeur, d’un monté au coursier & picque,
Sans faire bruit le grand enterreront.
II.
Sept coniurez au banquet feront luire,
Contre les trois le fer hors de nauire:
L’un les deux classes au grand fera conduire,
Quand par le mail. Dernier au front luy tire.
III.
Le successeur de la Duché viendra
Beaucoup plus outre que la mer de Toscane:
Gauloise Branche la Florence tiendra,
Dans son giron d’accord nautique Rane.
IV.
Le gros mastin de cité dechassé,
Sera fasché de l’estrange alliance,
Apres aux champs avoir le cerf chassé,
Le loup & l’ours se donront defiance.
V.
Sous ombre faincte d’oster de servitude,
Peuple & cité, l’usurpera luy mesmes:
Pire fera par fraux de ieune pute,
Livré au champ lisant le faux proësme.
VI.
Au Roy l’Augur sur le chef la main mettre,
Viendra prier pour la paix Italique:
A la main gauche viendra changer le sceptre,
Du Roy viendra Empereur pacifique.
VII.
Du Triumvir seront trouvez les os,
Cherchant profond thresor aenigmatique,
Ceux d’alentour ne seront en repos,
Ce concaver marbre et plomb metallique.
VIII.
Sera laissé le feu vif, mort caché,
Dedans les globes horribles espouvantable,
De nuict à classe cité en poudre lasché,
La cité à feu, l’ennemy favorable.
IX.
Iusques au fond la grand arq demolüe,
Par chef captif l’amy anticipé:
Naistra de dame front, face cheveluë,
Lors par astuce Duc à mort atrappé.
X.
Un chef Celtique dans le conflict blessé,
Aupres de cave voyant siens mort abbatre:
De sang & playes & d’ennemis pressé,
Et secourus par incogneus de quatre.
XI.
Mer par solaires seure ne passera,
Ceux de Venus tiendront tout l’Affrique:
Leur regne plus Saturne n’occupera,
Et changera la part Asiatique.
XII.
Aupres du lac Leman sera conduite,
Par grace estrange cité voulant trahir:
Avant son meurtre à Ausbourg la grand suitte,
Et ceux du Rhin la viendront invahir.
XIII.
Par grand fureur le Roy Romain Belgique,
Vexer voudra par phalange barbare:
Fureur grinssant chassera gent Lybique
Depuis Pannons iusques Hercules la hare.
XIV.
Saturne & Mars en Leo Espaigne captive,
Par chef Lybique au conflict attrapé,
Proche de Malthe, Heredde prinse vive,
Et Romain sceptre sera par Coq frappé.
XV.
En navigant captif prins grand Pontife,
Grans aprets faillir les clercs tumultuez:
Second esleu absent son bien debife,
Son favory bastard à mort tué.
XVI.
A son hault pris plus la lerme sabee,
D’humaine chair par mort en cendre mettre,
A l’isle Pharos par Croisars perturbee,
Alors qu’à Rhodes paroistra dur espectre.
XVII.
De nuict passant le Roy pres d’une Andronne,
Celuy de Cypres & principal guette:
Le Roy failly, la main fut long du Rosne,
Les coniurez l’iront à mort mettre.
XVIII.
De dueil mourra l’infelix prosligé,
Celebrera son vitrix l’hecatombe:
Pristine loy, franc edict redigé,
Le mur & Prince au septiesme iour tombe.
XIX.
Le grand Royal d’or, d’airain augmenté,
Rompu la pache, par ieune ouverte guerre:
Peuple affligé par un chef lamenté,
De sang barbare sera couverte terre.
XX.
Delà les Alpes grande armee passera,
Un peu devant naistra monstre vapin:
Prodigieux & subit tournera
Le grand Tosquan à son lieu plus propin.
XXI.
Par le trespas du Monarque Latin,
Ceux qu’il aura par regne secourus:
Le feu luyra divisé le butin.
La mort publique aux hardis incourus.
XXII.
Avant, qu’a Rome grand aye rendu l’ame,
Effrayeur grande à l’armee estrangere:
Par esquadrons l’embusche pres de Parme,
Puis les deux rouges ensemble feront chere.
XXIII.
Les deux contens seront unis ensemble,
Quand la plupart à Mars seront conioinct:
Le grand d’Affrique en effrayeur & tremble,
Duumvirat par la classe desioinct.
XXIV.
Le regne & loy sous Venus eslevé,
Saturne aura sus Iupiter empire:
La loy & regne par le Soleil levé,
Par Saturnis endurera le pire.
XXV.
Le prince Arabe Mars, Sol, Venus, Lyon,
Regne d’Eglise par mer succombera:
Devers la Perse bien pres d’un million,
Bisance, Egypte, ver. sepr. inuadera.
XXVI.
La gent esclave par un heur martial,
Viendra en haut degré tant eslevee:
Changeront Prince, naistra un Provincial,
Passer la mer copie aux monts levee.
XXVII.
Par feu & armes non loing de la marnegro,
Viendra de Perse occuper Trebisonde:
Trembler Phato, Methelin, Sol alegro,
De sang Arabe d’Adrie couvert onde.
XXVIII.
Le bras pendant à la iambe liee,
Visage pasle, au sein poignard caché:
Prois qui seront iurez de la meslee,
Au grand de Gennes sera le fer lasché.
XXIX.
La liberté ne sera recouvree,
L’occupera noir, fier, vilain, inique
Quand la matière du pont sera ouvree,
D’Hister, Venise faschee la republique.
XXX.
Tout à l’entour de la grande cité,
Seront soldats logez par champs & ville:
Donner l’assaut Paris, Rome incité,
Sur le pont sera faicte grand pille.
XXXI.
Par terre Antique chef de la sapience,
Qui de present est la rose du monde:
Pont ruiné, & sa grand' preeminence
Sera subdite & naufrage des ondes.
XXXII.
Où tout bon est, tout bien Soleil & Lune,
Est abondant, sa ruine s’approche:
Du ciel s’advance vaner ta fortune,
En mesme estat que la septiesme roche.
XXXIII.
Des principaux de cité rebellee,
Qui tiendront fort pour liberté r'avoir:
Detrancher masles, infelice meslee,
Cris, hurlemens à Nantes piteux voir.
XXXIV.
Du plus profond de l’Occident Anglois,
Où est le chef de l’Isle Britannique:
Entrera classe dans Gyronde par Blois,
Par vin et sel, feux cachez aux barriques.
XXXV.
Par cité franche de la grand mer Seline,
Qui porte encores à l’estomach la pierre,
Angloise classe viendra sous la bruine
Un rameau prendre, du grand ouverte guerre.
XXXVI.
De soeur le frere par simulte faintise
Viendra mesler rosee en myneral:
Sur la placente donne à vieille tardive,
Meurt, le goustant sera simple & rural.
XXXVII.
Trois cens seront d’un vouloir & accord,
Que pour venir au bout de leur attainte.
Vingt mois apres tous & records,
Leur Roy trahy simulant haine fainte.
XXXVIII.
Ce grand Monarque qu’au mort succedera,
Donnera vie illicite & lubrique,
Par nonchalance à tous concedera,
Qu’à la parfin faudra la loy Salique.
XXXIX.
Du vray rameau de fleur de lys yssu
Mis & logé heritier d’Hetrurie:
Son sang antique de longue main tissu,
Fera Florence florir en l’armoirie.
XL.
Le sang royal sera si tres meslé,
Contraints seront Gaulois de l’Hesperie:
On attendra que terme soit coulé,
Et que memoire de la voix soit perie.
XLI.
Nay sous les ombres & iournee nocturne,
Sera en regne & bonté souveraine:
Fera renaistre son sang de l’antique urne,
Renouvellant siecle d’or pour l’airain.
XLII.
Mars eslevé en son plus haut befroy,
Fera retraire les Allobrox de France:
La gent Lombarde fera si grand effroy,
A ceux de l’Aigle comprins sous la Balance.
XLIII.
La grand ruine des secrez ne s’esloigne,
Provence, Naples, Sicille, Seez & Ponce,
En Germaine, au Rhin & la Cologne,
Vexez à mort par tous ceux de Magonce.
XLIV.
Par mer le rouge sera prins de pyrates,
La paix sera par son moyen troublee:
L’ire & l’avare commettra par sainct acte,
Au grand Pontife sera l’armee doublee.
XLV.
Le grand Empire sera tost désolé,
Et translaté pres d’arduenne silue,
Les deux bastards par l’aisné décollé,
Et regnera Aneobarb nez de misue.
XLVI.
Par chapeaux rouges querelles & nouveaux scismes,
Quand on aura esleu le Sabinois:
On produira contre luy grands sophismes,
Et sera Rome lesee par Albanois.
XLVII.
Le grand Arabe marchera bien avant,
Trahy sera par les Bisantinois:
L’antique Rodes luy viendra au devant,
Et plus grand mal par austre Pannonois.
XLVIII.
Apres la grande affliction du sceptre,
Deux ennemis par eux seront defaicts:
Classe d’Affrique aux Pannons viendra naistre,
Par mer & terre feront horribles faicts.
XLIX.
Nul de l’Espaigne mais de l’antique France
Ne sera esleu pour le tremblant nacelle,
A l’ennemy sera faicte fiance,
Qui dans son regne sera peste cruelle.
L.
L’an que les frères du lys seront en aage,
L’un d’eux tiendra la grande Romanie:
Trembler les monts, ouvert Latin passage,
Pache macher contre fort d’Armenie.
LI.
La gent de Dace, d’Angleterre & Polonne,
Et de Boesme feront nouvelle ligue:
Pour passer outre d’Hercules la colonne,
Barcins, Tyrrens dresser cruelle brigue.
LII.
Un Roy sera qui donra l’opposite,
Les exilez eslevez sur le regne:
De sang nager la gent caste hypolite,
Et florira long temps sous telle enseigne.
LIII.
La loy du Sol & Venus contendus
Appropriant l’esprit de prophetie,
Ne l’un ne l’autre ne seront entendus,
Par sol tiendra la loy du grand Messie.
LIV.
Du pont Euxime, & la grand'Tartarie,
Un Roy sera qui viendra voir la Gaule:
Transpercera Alane & l’Armenie,
Et dans Bisance lairra sanglante Gaule.
LV.
De la Felice Arabie contrade,
Naistra puissant de loy Mahométique,
Vexer l’Espaigne, conquester la Grenade,
Et plus par mer à la gent Lygustique.
LVI.
Par le trespas du tref vieillard Pontife
Sera esleu Romain de bon aage,
Qu’il sera dict que le siege debiffe,
Et long tiendra & de picquant ouvrage.
LVII.
Istra du mont Gaulsier & Aventin,
Qui par le trou advertira l’armee,
Entre deux rocs sera prins le butin,
De Sext mansol faillir la renommee.
LVIII.
De l’aqueduct d’Uticense, Gardoing,
Par la forest & mont inaccessible,
Emmy du pont sera tasché au poing
Le chef nemans qui tant sera terrible.
LIX.
Au chef Anglois à Nysmes trop freiour,
Devers l’Espaigne au secours Aenobarbe
Plusieurs mourront par Mars ouvert ce iour,
Quand en Artois faillir estoille en barbe.
LX.
Par teste rase viendra bien mal eslire,
Plus que sa charge ne porte passera:
Si grande fureur & rage fera dire,
Qu’à feu & sang tout sexe trenchera.
LXI.
L’enfant du grand n’estant à sa naissance,
Subiuguera les hauts monts Apennis:
Fera trembler tous ceux de la balance,
Et des monts feux iusques à Mont-Senis.
LXII.
Sur les rochers sang on verra pleuvoir,
Sol Orient, Saturne Occidental:
Pres d’Orgon guerre, à Rome grand mal voir,
Nefs parfondrees, & prins le Tridental.
LXIII.
De vaine emprinse l’honneur indue plaincte,
Galliots errans par latins, froid, faim, vagues
Non loing du Tymbre de sang la terre taincte,
Et sur humains seront diverses plagues.
LXIV.
Les assemblez par repos du grand nombre,
Par terre & mer conseil contre mandé:
Pres de l’Autonne Gennes, Nice de l’ombre
Par champs & villes le chef contrebandé.
LXV.
Subit venu l’effrayeur sera grande,
Des principaux de l’affaire cachez:
Et dame embraise plus ne sera en veue
Ce peu à peu seront les grands fachez.
LXVI.
Sous les antiques edifices vestaux,
Non esloignez d’aque duct ruine:
De Sol et lune sont les luisans meteaux,
Ardante lampe Trian dor butine.
LXVII.
Quand chef Perouse n’ofera sa tunique
Sens au couvert tout nuds expolier,
Seront prins sept faict Aristocratique,
Le pere & fils mort par poincte au colier.
LXVIII.
Dans le Danube & du Rhin viendra boire
Le grand Chameau, ne s’en repentira:
Trembler du Rofne, & plus fort ceux de Loire.
Et pres des Alpes Coq le ruinera.
LXIX.
Plus ne sera le grand en faux sommeil,
L’inquiétude viendra prendre repos:
Dresser phalange d’or, azur & vermeil,
Subiuguer Affrique, la ronger iusques os.
LXX.
Des regions subiectes à la Balance
Feront troubler les monts par grande guerre,
Captifs tout sexe deu & tout Bisance,
Qu’on criera à l’aube terre à terre.
LXXI.
Par la fureur d’un qui attendra l’eau,
Par la grand rage tout l’exercice esmeu:
Chargé des nobles à dix sept bateaux,
Au long du Rosne tard messager venu.
LXXII.
Pour le plaisir d’edict voluptueux,
On mestera la poison dans la foy:
Venus sera en cours si vertueux,
Qu’obfusquera du Soleil tout à loy.
LXXIII.
Persecutee sera de Dieu l’Eglise,
Et les saints Temples seront expoliez,
L’enfant, la mere mettra nud en chemise,
Seront Arabes aux Polons ralliez.
LXXIV.
De sang Troyen naistra coeur Germanique
Qui deviendra en si haute puissance:
Hors chassera gent estrange Arabique,
Tournant l’Eglise en pristine preeminence.
LXXV.
Montera haut sur le bien plus à dextre,
Demourra assis sur la pierre quarree,
Vers le Midy posé à sa fenestre,
Baston tortu en main, bouche ferree.
LXXVI.
En lieu libere tendra son pavillon,
Et ne voudra en citez prendre place:
Aix, Carpen, l’Isle volce, Mont Cavaillon,
Poa tous ses lieux abolira sa trasse.
LXXVII.
Tous les degrez d’honneur Ecclesiastique
Seront changez en dial quirinal:
En Martial quirinal flaminique,
Puis un Roy de France le rendre vulcanal.
LXXVIII.
Les deux unis ne tiendront longuement,
Et dans treize ans au Barbare Satrappe,
Aux deux costez feront tel perdement,
Qu’un benira la Barque & sa cappe.
LXXIX.
La secree pompe viendra baisser les aisles,
Par la venuë du grand legislateur:
Humble haussera, vexera les rebelles,
Naistra sur terre aucun aemulateur.
LXXX.
Logmion grande Bisance approchera,
Chassee sera la barbarique Ligue:
Des deux loix l’une l’estinique laschera,
Barbare & Franche en perpetuelle brigue.
LXXXI.
L’oiseau Royal sur la cité solaire,
Sept mois devant fera nocturne augure:
Mur d’Orient cherra tonnerre, esclaire,
Sept iours aux portes les ennemis à l’heure.
LXXXII.
Au conclud pache hors de la forteresse,
Ne sortira celuy en desespoir mis:
Quant ceux d’Arbois, de Langres, contre Bresse
Auront mont Dolle, bouscade d’ennemis.
LXXXIII.
Ceux qui auront entreprins subvertir,
Nom pareil regne, puissant et invincible:
Feront par fraude, nuicts trois advertir,
Quand le plus grande à table lira Bible.
LXXXIV.
Naistra du gouphre & cité immesuree,
Nay de parents obscurs et tenebreux:
Qui la puissance du grand Roy reveree,
Voudra destruire par Roüan & Evreux.
LXXXV.
Par les Sueves & lieux circonvoisins,
Seront en guerre pour cause des nuees:
Gampamarins locustes & coufins,
Du Leman fautes seront bien desnuees.
LXXXVI.
Par les deux testes, & trois bras separés,
La cité grande sera par eaux vexee:
Des grands d’entr’eux par exil esgarés,
Par teste Perse Bisance fort pressee.
LXXXVII.
L’an que Saturne hors de servage,
Au francs terroir sera d’eau inondé:
De sang Troyen sera son mariage,
Et sera seur d’Espaignols circondé.
LXXXVIII.
Sur le sablon par un hideux deluge,
Des autres mers trouvé monstre marin:
Proche du lieu sera faict un refuge,
Tenant Savonne esclave de Turin.
LXXXIX.
Dedans Hongrie par Boheme, Navarre,
Et par banniere sainctes seditions:
Par fleurs de lys pays portant la barre,
Contre Orleans fera esmotions.
XC.
Dans les cyclades, en Perinthe & Larisse,
Dedans Sparte tout le Peloponnesse:
Si grand famine, peste par faux connisse,
Neuf mois tiendra & tout le cheronnesse.
XCI.
Au grand marché qu’on dict des mensongiers,
Du tout Torrent & champ Athenien:
Seront surpris par les chevaux legiers,
Par Albanois Mars, Leo, Sat, un versien.
XCII.
Après le siege tenu dix sept ans,
Cinq changeront en tel revolu terme:
Puis sera esleu de mesme temps,
Qui des Romains ne sera trop conforme.
XCIII.
Sous le terroir du rond globe lunaire,
Lors que sera dominateur Mercure:
L’Isle d’Escosse fera un luminaire,
Qui les Anglois mettra à desconfiture.
XCIV.
Translatera en la grand Germaine,
Brabant & Flandres, Gand, Bruges & Bologne
La tresve saincte, le grand duc d’Armenie,
Assaillira Vienne & la Coloigne.
XCV.
Nautique rame invitera les umbres,
Du grand Empire lors viendra conciter:
La mer Aegee des lignes les encombres,
Empeschant l’onde Tirrenne defflotez.
XCVI.
Sur le milieu du grand monde la rose,
Pour nouveaux faicts sang public espandu:
A dire vray on aura bouche close,
Lors au besoing viendra tard l’attendu.
XCVII.
Le nay difformé par horreur suffoqué,
Dans la cité du grand Roy habitable:
L’edict severe des captifs revoqué
Gresle & tonnerre, Condon inestimable.
XCVIII.
A quarante huict degré climaterique,
Afin de cancer si grande seicheresse:
Poisson en mer, fleuve, lac cuit hectique,
Bearn, Bigorre par feu ciel en detresse.
XCIX.
Milan, Ferrare, Turin, & Aquilleye.
Capne, Brundis vexez par gents Celtique:
Par le Lyon & phalange aquilee
Quant Rome aura le chef vieux Britannique.
C.
Le boutefeu par son feu attrapé,
Du feu du ciel à Carcas & Cominge,
Foix, Aux, Mazere, haut vieillart eschappé,
Par ceux de Hasse, des Saxons & Turinge.

Retour Nostradamus

Retour Prophètes