CENTURIE IV

I.

Cela du reste de sang non espandu,
Venise quiert secours estre donné,
Apres avoir bien loing temps attendu,
Cité livree au premier cornet sonné.

II.

Par mort la France prendra voyage à faire,
Classe par mer, marcher monts Pyrenees,
Espaigne en trouble, marcher gent militaire:
Des plus grands Dames en France emmenees.

III.

D'Arras & Bourges, de Brodes grans enseignes,
Un plus grand nombre de Gascons battre à pied,
Ceux long du Rosne saigneront les Espaignes:
Proche du mont où Sagonte s'assied.

IV.

L'impotent Prince faché, plaincts & querelles
De rapts & pillé, par Coqz & par Libyques:
Grands est par terre par mer infinies voilles,
Seure Italie sera chassant Celtiques.

V.

Croix, paix, soubs un accomply divin verbe,
L'Espaigne & Gaule seront unis ensemble:
Grand clade proche, & combat tresacerbe,
Coeur si hardy ne sera qui ne tremble.

VI.

D'habits nouveaux apres fait la treuve,
Malice tramme & machination:
Premier mourra qui en fera la preuve,
Couleur Venise insidiation.

VII.

Le mineur fils du grand & hay Prince,
De lepre aura à vingt ans grande tache,
De dueil sa mere mourra bien triste & mince,
Et il mourra la où tombe cher lache.

VIII.

La grand cité d'assaut prompt & repentin,
Surprins de nuict, garde interrompus:
Les excubies & veilles sainct Quintin,
Trucidez gardes & les portails rompus.

IX.

Le chef du camp au milieu de la presse,
D'un coup de fleche sera blessé aux cuisses,
Lors que Geneve en larmes & detresse,
Sera trahie par Lozan & Souysses.

X.

Le ieune Prince accusé faulsement,
Mettra en trouble le camp & en querelles:
Meurtry le chef pour le soustenement,
Sceptre appaiser: puis guerir escroüelles.

XI.

Celuy qu'aura couvert de la grand cappe,
Sera induict à quelque cas patrer:
Les douze rouges viendront souiller la nappe
Soubs meurtre, meurtre se viendra perpetrer.

XII.

Le camp plus grand de route mis en fuite,
Guaires plus outre ne sera pourchassé:
Ost recampé, & legion reduicte,
Puis hors des Gaules du tout sera chassé.

XIII.

De plus grand perte nouvelles rapportees,
Le raport fait le camp s'etonnera:
Bandes unies encontres revoltees,
Double phalange, grand abandonnera.

XIV.

La mort subite du premier personnage
Aura changé & mis un autre au regne:
Tost, tard venu à si haut & bas aage,
Que terre & mer faudra que on le craigne.

XV.

D'où pensera faire venir famine,
De là viendra se rassasiement:
L'oeil de la mer par avare canine
Pour de l'un l'autre donra huyle, froment.

XVI.

La cité franche de liberté fait serve,
Des prosligez et resveurs fait Asyle:
Le Roy changé à eux non si proterve,
De cent seront devenus plus de mille.

XVII.

Changer à Baaune, Nuy, Chalons, & Dijon,
Le duc voulant amender la Barree
Marchant pres fleuve, poisson, bec de plongeon
Verra la queüe: porte sera serree.

XVIII.

Des plus lettrez dessus les faicts celestes
Seront par Princes ignorans reprouvez:
Punis d'Edict, chassez, comme scelestes,
Et mis à mort là où seront trouves.

XIX.

Devant Roüan d'Insubres mis le siege,
Par terre & mer enfermez les passages:
D'haynaut & Flandres, de Gand & ceux de Liege,
Par dons lenees raviront les rivages.

XX.

Paix, uberté long temps lieu loüera,
Par tout son regne desert la fleur de lys:
Corps morts d'eau, terre là l'on apportera,
Sperants vain heur d'estre là ensevelis.

XXI.

Le changement sera fort difficile,
Cité, province au change gain fera:
Coeur haut, prudent mis, chassé luy habile,
Mer, terre, peuple son estat changera.

XXII.

La grand copie qui sera dechassee,
Dans un moment fera besoing au Roy,
La foy promise de loing sera faussee,
Nud se verra en piteux desarroy.

XXIII.

La legion dans la marine classe,
Calcine, Magnes soulphre, & poix bruslera:
Le long repos de l'assuree place,
Port Selyn, Hercle feu les consumera.

XXIV.

Ouy soubs terre saincte Dame voix sainte,
Humaine flamme pour divine voir luire:
Fera des seuls de leur sang terre tainte,
Et les saincts temples pour les impurs destruire.

XXV.

Corps sublimes sans fin à l'oeil visibles:
Obnubiler viendront par ces raisons:
Corps, front comprins, sans chef & invisibles.
Diminuant les sacrees oraisons.

XXVI.

Lou grand eyssame se levera d'abelhos,
Que non sauran don te siegen venguddos:
Deuech l'ebousq, lou gach dessous les treilhos
Ciutard trahido per cinq lengos non nudos.

XXVII.

Salon, Manfol, Tarascon de Sex, l'arc,
Où est debout encor la piramide:
Viendront livrer le Prince Dannemarc,
Rachat honny eu temple d'Artemide.

XXVIII.

Lors que Venus du Sol sera couvert,
Subs l'esplendeur sera forme occulte:
Mercure au feu les aura descouvert,
Par bruit bellique sera mis à l'insulte.

XXIX.

Le Sol caché eclipse par Mercure,
Nessera mis que pour le ciel second:
De Ulcan Hermes sera faicte pasture,
Sol sera veu peur, rutiland & blond.

XXX.

Plus onze fois Luna Sol ne voudra,
Tous augmenté & baissez de degré:
Et si bas mis que peu or on coudra,
Qu'après faim, peste, descouvert le secret.

XXXI.

La Lune au plain de nuict sur le haut mont,
Le nouveau spohe d'un seul cerueau l'a veu:
Par ses disciples estre immortel semond,
Yeux au midy, en feins, mains, corps au feu.

XXXII.

Es lieux & temps chair ou poisson donra lieu,
La loy commune sera faicte au contraire:
Vieux tindra fort puis osté du milieu,
Le Panta chiona philon mis fort arrière.

XXXIII.

Iupiter ioinct plus Venus qu'à la Lune,
Apparoissant de plenitude blanche:
Venus cachee sous la blancheur Neptune
De Mars frappee par la gravee branche.

XXXIV.

Le grand mené captif d'estrange terre,
D'or enchainé au Roy Chiren offert:
Qui dans Ausone, Milan perdra la guerre,
Et tout son os mis à feu & à fer.

XXXV.

Le feu estaint, les vierges trahiront
La plus grande part de la bande nouvelle:
Fouldre à fer, lance les seuls Roy garderont
Etrusque & Corse, de nuict gorge allumelle.

XXXVI.

Les ieux nouveaux en Gaule redressez,
Apres victoire de l'Insubre champaigne:
Monts d'Espeire, les grands liez, troussez,
De peur trembler la Romaigne & l'Espaigne.

XXXVII.

Gaulois par saults, monts viendra penetrer:
Occupera le grand lieu de l'Insubre,
Au plus profond son ost fera entrer,
Gennes, Monech pousseront classe rubre.

XXXVIII.

Pendant que Duc, Roy, Royne occupera,
Chef Bizant du captif en Samothrace:
Avant l'assault l'un l'autre mangera
Rebours serré suyvra du sang la trace.

XXXIX.

Les Rhodiens demanderont secours,
Par le neglet de ses hoyrs delaissee,
L'empire Arabe revalera son cours,
Par Hesperies la cause redressee.

XL.

Les forteresses des assiegez serrez,
Par poudre à feu profondez en abysme,
Les proditeurs seront tous vifs serrez,
Onc aux sacristes n'advint si piteux scisme.

XLI.

Gymnique sexe captive par hostage,
Viendra de nuict custodes decevoir,
Le chef du camp deçeu par son langage,
Lairra à la gente, fera piteux à voir.

XLII.

Geneve & Langres par ceux de Chartres & Dole.
Et par Grenoble captif au Montlimard,
Seysset, Lozanne, par fraudulente dole,
Les trahiront par or soixante marc.

XLIII.

Seront ouys au ciel les armes battre:
Celuy au mesme les divins ennemis,
Voudront loix sainctes iniustement debatre,
Par foudre & guerre bien croyans à mort mis.

XLIV.

Deux gros de Mende, & de Roudés & Milhau,
Cahours, Limoges, Chartres malo sepmano
De nuech l'intrado, de Bourdeaux un cailhau,
Par Perigort au toc de la campano.

XLV.

Par conflict Roy, regne abandonnera,
Le plus grand chef faillira au besoing,
Mors profligez peu en rechapera,
Tous destranchez, un en sera tesmoing.

XLVI.

Bien defendu le faict par excellence,
Garde toy Tours de ta proche ruine,
Londres & Nantes par Reims fera deffense
Ne passe outre au temps de la bruine.

XLVII.

Le noir farouche quand aura essayé
Sa main sanguine par feu, fer, arc tendus,
Trestout le peuple sera tant effrayé,
Voir les plus grans par col & pieds pendus.

XLVIII.

Planure Ansonne fertile, spacieuse,
Produira taons si tant de sauterelles,
Clarté solaire deviendra nubileuse,
Ronger le tout, grand peste venir d'elles.

XLIX.

Devant le peuple sang sera respandu,
Que du haut ciel ne viendra esloigner,
Mais d'un long temps ne sera entendu,
L'esprit d'un seul le viendra tesmoigner.

L.

Libra verra regner les Hesperies,
De ciel & terre tenir la Monarchie,
D'Asie forces nul ne verra peries,
Que sept ne tiennent par rang la hierarchie.

LI.

Un Duc cupide son ennemy ensuyvre,
Dans entrera empeschant la phalange,
Hastez à pied si pres viendront poursuyvre,
Que la iournee conflite pres de Gange.

LII.

En cité obsesse aux murs hommes & femmes,
Ennemis hors le chef prest à soy rendre:
Vent sera fort encontre les gendarmes,
Chassez seront par chaux, poussière, & cendre.

LIII.

Les fugitifs & bannis revoquez,
Peres & fils grand garnissant les hauts puits,
Le cruel pere & les siens suffoquez,
Son fils plus pire submergé dans le puits.

LIV.

Du nom qui oncques ne fut au Roy Gaulois,
Iamais ne fut un foudre si craintif,
Tremblant l'Italie, l'Espaigne & les Anglois,
De femme estrangers grandement attentif.

LV.

Quand la corneille sur tout de brique ioincte,
Durant sept heures ne fera que crier:
Mort presagee de sang statue taincte,
Tyran meurtry, aux Dieux peuple prier.

LVI.

Apres victoire de rabieuse langue,
L'esprit tremté en tranquil & repos,
Victeur sanguin par conflict faict harangue,
Roustir la langue & la chair & les os.

LVII.

Ignare enuie au grand Roy supportee,
Tiendra propos deffendre les escripts:
Sa femme non femme par un autre tentée,
Plus double deux ne fort ne criz.

LVIII.

Soleil ardent dans le gosier coller,
De sang humain arrouser terre Etrusque:
Chef seille d'eau, mener son fils filer,
Captive dame conduicte en terre Turque.

LIX.

Deux assiegez en ardente ferveur,
De soif estaincts pour deux plaines tasses,
Le forte limmé, & un vieillard resveur,
Aux Genevois de Nira monstra trasse.

LX.

Les sept enfans en hostage laissez,
Le tiers viendra son enfant trucider,
Deux par son fils seront d'estoc percez,
Gennes, Florence, los viendra encorder.

LXI.

Le vieux mocqué privé de sa place,
Par l'estranger qui le subornera,
Mains de son fils mangees devant sa face,
Le frere à Chartres, Orl Roüan trahira.

LXII.

Un coronel machine ambition,
Sa saisira de la grande armee,
Contre son Prince fainte invention,
Et descouvert sera soubs sa ramee.

LXIII.

L'armée Celtique contre les montaignars,
Qui seront sceuz & prins à la pipee:
Paysans fresz poulseront tost faugnars,
Precipitez tous au fils de l'espee.

LXIV.

Le deffaillant en habit de bourgeois,
Viendra le Roy tenter de son offense:
Quinze soldats la pluspart Ustageois,
Vie derniere & chef de sa chevance.

LXV.

Au deserteur de la grande forteresse,
Apres qu'aura son lieu habandonné,
Son adversaire fera grand proüesse,
L'Empereur tost mort sera condamné.

LXVI.

Sous couleur fainte de sept testes rasees,
Seront semez divers explcrateurs,
Puits & fontains de poisons arrousees,
Au fort de Gennes humains devorateurs.

LXVII.

Lors que Saturne & Mars esgaux combust,
L'air fort seiché longue trajection,
Par feux secrets d'ardeur grand lieu adust,
Peu pluye, vent chault, guerres, incursion.

LXVIII.

En lieu bien proche non esloigné de Venus,
Les deux plus grands de l'Asie & d'Aphrique,
Du Ryn & Hister qu'on dira sont venus,
Cris, pleurs à Malte & costé Ligustique.

LXIX.

La cité grande les exiles tiendront,
Les citadins morts, meurtris & chassez,
Ceux d'Aquilee à Parme promettront,
Monstrer l'entree par les lieux non trassez.

LXX.

Bien contigue des grands monts Pyrenees,
Un contre l'Aigle grand copie addresser,
Ouvertes veines, forces extreminees,
Que iusqu'à Pau le chef viendra chasser.

LXXI.

En lieu d'espouse les filles trucidees,
Meurtre à grand faute ne fera superstile,
Dedans le puys vestules inondees,
L'espouse estainte pur haute d'Aconile.

LXXII.

Les Artomiques par Agen & l'Estore,
A sainct Felix feront leur parlement:
Ceux de Basas viendront à la mal'heure,
Saisir Condon & Marsan promptement.

LXXIII.

Le nepveu grand par force prouvera,
Le pache fait du coeur pusillanime,
Ferrare & Ast le Duc esprouvera,
Par lors qu'au soir sera le pantomime.

LXXIV.

Du lac Leman & ceux de Brannonices
Tous assemblez contre ceux d'Aquitaine.
Germains beaucoup, encore plus Souisses,
Seront des faicts avec ceux d'Humaine.

LXXV.

Prest à combattre fera defection,
Chef adversaire obtiendra la victoire:
L'arriere garde fera defension,
Les defaillans mort au blanc territoire.

LXXVI.

Les Nictobriges par ceux de Perigort,
Seront vexes, tenant iusques au Rosne,
L'associé de Gascons & Begorne,
Trahir le temple, le prestre estant au prosne.

LXXVII.

Selin Monarque l'Italie pacifique,
Regnes unis, Roy Chrestien du monde,
Mourant voudra coucher en terre blesique,
Apres pyrates avoir chassé de l'onde.

LXXVIII.

La grand'armee de la pugne civile,
Pour de nuict parme à l'estrange trouvee,
Septante neuf meurtris dedans la ville,
Les estrangers passez tout à l'espee.

LXXIX.

Sang Royal fuis, Monhurt, Mas, Eguillon,
Remplis seront de Bourdelois les Landes,
Navarre, Bygorre poinctes & eguillons,
Profonds de faims, vorer de Liege glandes.

LXXX.

Pres du grand fleuve, grand fosse, terre egeste,
En quinze pars sera l'eau divisee:
La cité prinse, feu, sang, cris, conflict mettre,
Et la plus part concerne au collisee.

LXXXI.

Pont on fera promptement de nacelles,
Passer l'armee du grand Prince Belgique:
Dans profondez, & non loing de Brucelles,
Outre passez, detranchez sept à picque.

LXXXII.

Amas s'approche venant d'Esclavonie,
L'Olestant vieux cité ruynera:
Fort desolee verra sa Romanie,
Puis la grand' flamme estaindre ne sçaura.

LXXXIII.

Combat nocturne le vaillant capitaine,
Vaincu fuyra peu de gens profligé:
Son peuple esmeu, sedition non vaine,
Son propre fils le tiendra assiegé.

LXXXIV.

Un grand d'Auxerre mourra bien miserable,
Chassé de ceux qui sous luy ont esté:
Serré de chaines, apres d'un rude cable,
En l'an que Mars, Venus & Sol mis on esté.

LXXXV.

Le charbon blanc du noir sera chaffé,
Prisonnier faict mené au tombereau,
More Chameau sur pieds entrelassez,
Lors le puisné sillera l'aubereau.

LXXXVI.

L'an que Saturne en eau sera conioinct,
Avecques Sol, le Roy fort et puissant,
A Reims & Aix sera receu & oingt,
Apres conquestes meurtrira innocens.

LXXXVII.

Un fils du Roy tant de languages apprins,
A son aisné au regne different:
Son pere beau au plus grand fils comprins,
Fera perir principal adherant.

LXXXVIII.

Le grand Antoine de nom de faict sordide,
De Phthyriaise à son dernier rongé:
Un qui de plomb voudra estre cupide,
Passant le port d'esleu sera plongé.

LXXXIX.

Trente de Londres secret coniureront,
Contre leur Roy, sur le pont l'entreprinse:
Luy, fatalites la mort desgousteront,
Un Roy esleu blonde, natif de Frize.

XC.

Les deux copies aux murs ne pourront ioindre
Dans cest instant trembler Milan, Ticin:
Faim soif, doutance si fort les viendra poindre
Chair, pain, ne vivres n'auront un seul boucin.

XCI.

Au Duc Gaulois contrainct battre au duelle,
La nef Mellele Monech n'approchera,
Tort accusé, prison perpétuelle,
Son fils regner auant mort taschera.

XCII.

Teste tranchee du vaillant capitaine,
Sera gettee devant son adversaire:
Son corps pendu de la classe à l'antenne,
Confus fuira par rames à vent contraire.

XCIII.

Un serpent veu proche du lict Royal,
Sera par dame nuict chiens n'abayeront:
Lors naistre en France un Prince tant Royal,
Du ciel venu tous les Princes verront.

XCIV.

Deux grands freres seront chassez d'Espaigne,
L'aisne vaincu sous les monts Pyrenees:
Rougir mer, Rosne, sang Lemand d'Alemaigne
Narbon, Blyterre, d'Agath, contaminees.

XCV.

Le regne à deux l'aissé bien peu tiendront,
Trois ans sept mois passez feront la guere
Les deux vestales contre rebelleront,
Victor puisnay en Armenique terre.

XCVI.

La soeur de l'Isle Britannique
Quinze ans devant le frere aura naissance:
Par son promis moyennant verrifique,
Succedera au regne de balance.

XCVII.

L'an que Mercure, Mars, Venus retrograde,
Du grand Monarque la ligne ne faillit:
Esleu du peuple l'usitant pres de Gagdole,
Qu'en paix & regne viendra fort envieillir.

XCVIII.

Les Albanois passeront dedans Rome,
Moyennant Langres demipler assublés,
Marquis & Duc ne pardonnes à l'homme,
Feu, sang, morbilles point d'eau, faillir les blés.

XCIX.

Laisné vaillant de la fille du Roy,
Repoussera si profond les Celtiques,
Qu'il mettra fourdes, combien en tel arroy
Peu et loing, puis profond és Hespériques.

C.

De feu céleste au Royal edifice,
Quand la lumière de Mars defaillira,
Sept mois grand guerre, mort gent de malefice,
Rouan, Evreux au Roy ne faillira.

Retour Nostradamus

Retour Prophètes