CENTURIE III |
I. |
Apres combat et bataille navalle, Le grand Neptune à
son plus haut befroy: Rouge adversaire de peur viendra pasle,
Mettant le grand Ocean en effroy. |
II. |
Le divin Verbe donra à la substance, Comprins ciel,
terre, or occult au laict mystique Corps, ame, esprit ayant
toute puissance, Tant soubs ses pieds comme au siege Celique. |
III. |
Mars & Mercure, & l'argent ioint ensemble, Vers le
Midy extreme siccité: Au fond d'Asie on dira terre tremble,
Corinthe, Ephese lors en perplexité. |
IV. |
Quand seront proche le defaut des lunaires, De l'un à
l'autre ne distant grandement, Froid, siccité, dangers
vers les frontières, Mesme où l'oracle a prins
commencement. |
V. |
Pres loing defaut de deux grands luminaires, Qui surviendra
entre l'Avril et Mars: O quel cherté: mais deux grands
debonnaires Par terre & mer secourrant toutes parts. |
VI. |
Dans temple clos le foudre y entrera, Les citadins dedans
leur fort grevez: Chevaux, boeufs, hommes, l'onde mur touchera
Par faim, soif, soubs les plus foibles armez. |
VII. |
Les fugitifs, feu du ciel sus les piques. Conflict prochain
des corbeaux, s'esbatans, De terre on crie, aide, secours celiques,
Quand pres des murs seront les combattans. |
VIII. |
Les Cimbres ioints auecques leurs voisins, Depopuler viendront
presque l'Espaigne: Gens amassez, Guienne & Limosins
Seront en ligue, & leur feront compaigne. |
IX. |
Bourdeaux, Roüan, & la Rochelle ioints, Tiendront
autour la grande mer Occeane, Anglois, Bretons, & les Flamans
conioints, Les chasseront iusqu'au pres de Roüane. |
X. |
De sang & faim plus grand calamité, Sept fois
s'appreste à la marine plage: Monech de faim, lieu pris,
captivité, Le grand, mené croc enferree cage. |
XI. |
Les armes battre au ciel longue saison, L'arbre au milieu
de la cité tombé: Verbine, rogne, glaive, en face
tyson, Lors le monarque d'Hadrie succombé. |
XII. |
Par la tumeur de Heb, Po, Timbre, & Rome, Et par l'estang
Leman & Aretin: Les deux grands chefs & citez de Garonne,
Prins, morts, noyez. Partir humain butin. |
XIII. |
Par foudre en l'arche or & argent fondu, De deux captifs
l'un l'autre mangera: De la cité le plus grand estendu,
Quand submergee la classe nagera. |
XIV. |
Par le rameau du vaillant personnage, De France infime, par
le pere infelice: Honneurs, richesses, travail en son viel aage,
Pour avoir creu le conseil d'homme nice. |
XV. |
Coeur, vigueur, gloire le regne changera. De tous points
contre ayant son adversaire: Lors France enfance par mort subiuguera,
Un grand Regent sera lors plus contraire. |
XVI. |
Un prince Anglois, Mars à son coeur de ciel, Voudra
poursuivre la fortune prospere: Des deux duelles l'un percera
le fiel, Hay de luy bien aymé de sa mere. |
XVII. |
Mont Aventine brusler nuict sera veu, Le ciel obscur tout
à un coup en Flandres, Quand le Monarque chassera son
neueu, Leurs gens d'Eglise commettront les esclandres. |
XVIII. |
Apres la pluye laict asses longuette, En plusieurs lieux
de Rheims le ciel touché: O quel conflict de sang pres
d'eux s'appreste, Peres & fils Roys n'oseront approché. |
XIX. |
En Luques sang & laict viendra plouvoir, Vn peu devant
changement de preteur: Grand peste & guerre faim & soif
fera voir, Loin où mourra leur Prince recteur. |
XX. |
Par les contrees du grand fleuve Bethique, Loin d'Ibere au
Royaume de Grenade: Croix repoussees par gens Mahometiques,
Un Cordube trahira le contrade. |
XXI. |
Au Crustamin par mer Hadriatique, Apparoistra un horrible
poisson, De face humaine & la fin aquatique, Qui se
prendra dehors de l'ameçon. |
XXII. |
Six iours l'assaut devant cité donné: Livree
sera forte & aspre bataille: Trois la rendront & à
eux pardonné, Le reste à feu & sang tranche
taille. |
XXIII. |
Si France passe outre mer Lygustique, Tu te verras en isles
& mers enclos: Mahommet contraire plus mer Hadriatique,
Chevaux & Asnes tu rongeras les os. |
XXIV. |
De l'entreprinse grande confusion. Perte de gens, thresor
innumerable: Tu n'y dois faire encore tension, France à
mon dire fais que sois recordable. |
XXV. |
Qui au royaume Navarrois parviendra, Quand le Sicile &
Naples seront ioints: Bigore & Landes par Foix loron tiendra,
D'un qui d'Espagne sera par trop conioinct. |
XXVI. |
Des Roys & Princes dresseront simulacres, Augures, creuz
esleuez aruspices: Corne, victime d'oree, & d'azur, d'acre,
Interpretez seront les extipices. |
XXVII. |
Prince lybinique puissant en Occident, François d'Arabe
viendra tant enflammer, Sçavant aux lettres fera condescendent,
La langue Arabe en François translater. |
XXVIII. |
De terre foible & pauvre parentele, Par bout & paix
parviendra dans l'Empire, Long temps regner une ieune femelle,
Qu'oncques en regne n'en suruint un si pire. |
XXIX. |
Les deux neveux en divers lieux nourris: Navale pugne, terre
peres tombez: Viendront si haut eslevez enguerris, Venger
l'iniure, ennemis succombez. |
XXX. |
Celuy qu'en luitte & fer au faict bellique Aura porté
plus grand que luy le pris: De nuict au lict six luy feront
la pique, Nud sans harnois subit sera surprins. |
XXXI. |
Aux champs de Mede, d'Arabe & d'Armenie Deux grands copies
trois fois s'assembleront: Pres du riuage d'Araxes la mesgnie,
Du grand Soliman en terre tomberont. |
XXXII. |
Le grand sepulchre du peuple Aquitanique S'approchera aupres
de la Toscane. Quand Mars sera pres du coing Germanique,
Et au terroir de la regent Mantuane. |
XXXIII. |
En la cité où le loup entrera, Bien pres de
là les ennemis seront: Copie estrange grand pays gastera,
Aux murs & Alpes les amis passeront. |
XXXIV. |
Quand le deffaut du Soleil lors sera, Sur le plain iour le
monstre sera veu, Tout autrement on l'interpretera, Cherté
n'a garde nul n'y aura pourveu. |
XXXV. |
Du plus profond de l'Occident d'Europe, De pauvres gens un
ieune enfant naistra, Qui par sa langue seduira grande troupe,
Sont bruit au regne d'Orient plus croistra. |
XXXVI. |
Enseuely non mort apopletique, Sera trouvé avoir les
mains mangees, Quand la cité damnera l'heretique,
Qu'avoit leurs loix, ce leur sembloit changees. |
XXXVII. |
Avant l'assaut l'oraison prononcee, Milan prins d'Aigle par
embusches deceus, Muraille antique par canons enfoncee,
Par feu & sang à mercy peu receus. |
XXXVIII. |
La gens Gauloise & nation estrange, Outre les monts,
morts, prins & profligez, Au moins contraire & proche
de vendange, Par les seigneurs en accord redigez. |
XXXIX. |
Les sept en trois moins en concorde, Pour subiuguer des Alpes
Apennines, Mais la tempeste & Ligure coüarde, Les
profligent en subites ruines. |
XL. |
Le grand theatre se viendra redresser, Les dez iettez &
les rets ja tendus, Trop le premier en glaz viendra lasser,
Par arc prostrais de long temps ja fendus. |
XLI. |
Bossu sera esleu par le conseil. Plus hideux monstre en terre
n'apperceu, Le coup voulant crevera l'oeil, Le traistre
au Roy pour fidele receu. |
XLII. |
L'enfant naistra à deux dents en la gorge, Pierres
en Tuscie par pluy tomberont, Peu d'ans apres ne sera bled ni
orge, Pour saouler ceux qui de faim failliront. |
XLIII. |
Gens d'alentour de Tarn, Loth, & Garonne, Gardez les
monts Apennines passer, Vostre tombeau pres de Rome & d'Anconne,
Le noir poil crespe fera trophe dresser. |
XLIV. |
Quand l'animal à l'homme domestique, Apres grands
peines & sauts viendra parler, De foudre à vierge
sera si malefique, De terre prinse & suspendue en l'air. |
XLV. |
Les cinq estranges entrez dedans le temple, Leur sang viendra
la terre prophaner: Aux Tholosains sera bien dur exemple,
D'un qui viendra ses loix exterminer. |
XLVI. |
Le ciel (de Plancus la cité) nous presage, Par clers
insignes & par estoilles fixes, Que de son change subit
s'approche l'aage, Ne pour son bien, ne pour ses malefices. |
XLVII. |
Le vieux Monarque dechassé de son regne, Aux Oreients
son secours ira querre: Pour peur des croix ployera son enseigne,
En Mitylene ira par port & par terre. |
XLVIII. |
Sept cens captifs attachez rudement, Pour la moitié
meurtrir, donné le fort: Le proche espoir viendra si
promptement, Mais non si tost qu'vne quinziesme mort. |
XLIX. |
Regne Gaulois tu seras bien changé, En lieu estrange
est translaté l'empire: En autres moeurs & loix seras
rangé, Roan, & Chartres te feront bien du pire. |
L. |
La republique de la grande cité, A grand rigueur ne
voudra consentir, Roy sortir hors par trompette cité,
L'eschelle au mur, la cité repentir. |
LI. |
Paris coniure un grand meurtre commettre, Blois le fera sortir
en plein effect: Ceux d'Orleans voudront leur chef remettre,
Angers, Troyes, Langres, leur feront vn meffait. |
LII. |
En la champagne sera si longue pluye, Et en la Poüille
si grande siccité, Coq verra l'Aigle, l'aisle mal accomplie,
Par Lyon mise sera en extremité. |
LIII. |
Quand le plus grand emportera le pris, De Nuremberg, d'Ausbourg
& ceux de Basle Par Agrippine chef Frankfort repris,
Traverseront par Flamant iusqu'en Gale. |
LIV. |
L'un des plus grands fuyera aux Espaignes Qu'en longue playe
apres viendra saigner, Passant copies par les hautes montaignes,
Devastant tout, & puis en paix regner. |
LV. |
En l'an qu'un oeil en France regnera, La Cour sera en un
bien fascheux trouble, Le grand de Blois son amy tuera,
Le regne mis en mal & doubte double. |
LVI. |
Montauban, Nismes, Avignon & Besier, Peste, tonnerre
& gresle à fin de Mars, De Paris Pont, Lyon mur,
Montpellier, Depuis six cens & sept-vingt trois pars. |
LVII. |
Sept fois changer verrez gens Britannique, Taints en sang
en deux cens novante an, Franche non point par appuy Germanique,
Aries doubte son pole bastarnan. |
LVIII. |
Aupres du Rhin des montaignes Noriques Naistra un grand de
gens trop tard venu, Qui defendra Saurome & Pannoniques,
Qu'on ne sçaura qu'il sera devenu. |
LIX. |
Barbare empire par le tiers usurpé, La plus grand
part le son sang mettra à mort: Par mort senile par luy
le quart frappé, Pour peyr que sang par le sang ne soit
mort. |
LX. |
Par toute Asie grand proscription, Mesme en Mysie, Lysie
& Pamphylie: Sang versera par absolution, D'un ieune
noir remply de felonnie. |
LXI. |
La grande bande & secte crucigere. Se dressera en Mesopotamie:
Du proche fleuve compagnie legere, Que telle loy tiendra pour
ennemie. |
LXII. |
A Carcassonne conduira ses menees. Romain pouvoir sera du
tout à bas, Proche del duero par mer Cyrrene close,
Viendra perses les grands monts Pyrenees |
LXIII. |
La main plus courte & sa percee gloze, Son grand voisin
imiter les vestiges: Occultes haines civiles & debats,
Retarderont au bouffons leurs folies. |
LXIV. |
Le chef de Perse remplira grande Olchade, Classe Triteme
contre gent Mahometiques, De Parthe & Mede, & piller
les Cyclades, Repos long temps au grand port Ionique. |
LXV. |
Quand le sepulchre du grand Romain trouvé, Le iour
apres sera esleu Pontife, Du Senat gueres il ne sera prouvé,
Empoisonné, son sang au sacré scyphe. |
LXVI. |
Le grand Ballif d'Orleans mis à mort, Sera par un
de sang vindicatif: De mort merite ne monrra que par sort,
Des pieds & mains malle faisoit captif. |
LXVII. |
Vne nouvelle secte de Philosophes, Mesprisant mort, or, honneurs
& richesses, Des monts Germanins ne seront limitrophes,
A les ensuyvre auront appuy & presses. |
LXVIII. |
Peuple sans chef d'Espaigne d'Italie, Morts, profligez dedans
le Cheronesse, Leur dict trahy par legere folie, Le sang
nager par tout à la traverse. |
LXIX. |
Grand exercite conduict par iouvenceau, Se viendra rendre
aux mains des ennemis, Mais le vieillard nay au demi pourceau,
Fera Chalon & Mascon estre amis. |
LXX. |
La grand Bretaigne comprinse d'Angleterre, Viendra par eaux
si haut à inonder La Ligue neuve d'Ausonne fera guerre,
Que contre eux ils se viendront bander. |
LXXI. |
Ceux dans les isles de long temps assiegez, Prendront vigueur
force contre ennemis: Ceux par dehors morts de faim profligez,
En plus grand faim que iamais seront mis. |
LXXII. |
Le bon vieillard tout vif ensevely, Pres du grand fleuve
par fausse soupçon: Le nouveau vieux de richesse ennobly,
Prins à chemin tout l'or de la rançon. |
LXXIII. |
Quand dans le regne parviendra le boiteux, Competiteur aura
proche bastard, Luy et le regne viendront si fort roigneux,
Qu'ains qu'il guerisse son faict sera bien tard. |
LXXIV. |
Naples, Florence, Favence, & Imole, Seront en termes
de telle facherie, Que pour complaire aux malheureux de Nolle,
Plainct d'auoir faict à son chef moquerie. |
LXXV. |
Pau, Verone, Vicence, Sarragousse, De glaives loings, terroirs
de sang humides: Peste si grande viendra à la grand gousse,
Proche secours, & bien loing les remedes. |
LXXVI. |
En Germanie naistront diverses sectes, S'approchant fort
de l'heureux paganisme, Le coeur captif & petites receptes,
Feront retour à payer le vray disme. |
LXXVII. |
Le tiers climat sous Aries comprins, L'an mil sept cens vingt
& sept en Octobre Le Roy de Perse par ceux d'Egypte prins:
Conflit, mort perte: à la croix grand opprobe. |
LXXVIII. |
Le chef d'Escosse, avec six d'Allemagne, Par gens de mer
Orientaux captif: Traverseront le Calpre & Espagne,
Present en Perse au nouveau Roy craintif. |
LXXIX. |
L'ordre fatal sempiternel par chaisne, Viendra tourner par
orpte consequent: Du port Phocen sera rompue la chaisne,
La cité prinse, l'ennemy quant & quant. |
LXXX. |
Du regne Anglois le digne dechassé, Le conseiller
par ire mis à feu: Ses adherans iront si bas tracer,
Que le bastard sera demy receu. |
LXXXI. |
Le grand criard sans honte audacieux, Sera esleu gouverneur
de l'armee: La hardiesse de son contentieux, Le pont rompu,
cité de peur pasmee. |
LXXXII. |
Freins, Antibor, villes autour de Nice, Seront vastées
fort par mer & par terre: Les sauterelles terre & mer
vent propice, Prins, morts, troussez, pillez, sans loy de guerre. |
LXXXIII. |
Les longs cheveux de la Gaule Celtique; Accompagnez d'estranges
nations: Mettront captif la gent Aquitanique, Pour succomber
à leurs intentions. |
LXXXIV. |
La grande cité sera bien desolee, Des habitans un
seul n'y demourera: Mur, sexe, temple, & vierge violee,
Par fer, feu, peste, canon peuple mourra. |
LXXXV. |
Par cité prinse par tromperie & fraude Par le
moyen d'un beau ieune attrapé, Assaut donné Raubine
pres de Laude, Luy & tous morts pour avoir bien trompé. |
LXXXVI. |
Un chef d'Ausonne aux Espaignes ira, Par mer fera arrest
dedans Marseille, Avant sa mort un long temps languira.
Apres sa mort on verra grand merveille. |
LXXXVII. |
Classe Gauloisse n'approches de Corsegne, Moins de Sardaigne
tu t'en repentira: Trestous mourrez frustrez de l'aide grogne.
Sang nagera, captif ne me croiras. |
LXXXVIII. |
De Barselone par mer si grand'armee, Toute Marseille de frayeur
tremblera: Isles saisies de mer ayde fermee, Ton traditeur
en terre nagera. |
LXXXIX. |
En ce temps la sera frustree Cypres. De son secours de ceux
de mer Egee: Vieux trucidez, mais par mesles & lyphres
Seduict leur Roy, Royne, plus outragee. |
XC. |
Le grand Satyre & Tigre d'Hircanie, Don presenté
à ceux de l'Occean: Un chef classe istra de Carmanie:
Qui prendra texte au Tyrren Phocean. |
XCI. |
L'arbre qu'estoit par long temps mort seché, Dans
une nuict viendra à reverdir: Cor Roy malade, Prince
pied estanché, Criant d'ennemis fera voile bondir. |
XCII. |
Le monde proche du dernier periode, Saturne encor tard sera
de retour: Tanslat empire devers nation Brodde, L'oeil arraché
à Narbon par autour. |
XCIII. |
Dans Avignon tout le chef de l'Empire, Fera arrest pour Paris
desolé: Tricast tiendra l'Annibalique ire, Lyon par
change sera mal consolé. |
XCIV. |
De cinq cens ans plus compte lon tiendra, Celuy qu'estoit
l'ornement de son temps, Puis à un coup grande clarté
donra, Que par ce siecle les rendra trescontens. |
XCV. |
La loy Moricque on verra deffaillir. Apres une autre beaucoup
plus seductive: Boristhennes premier viendra faillir, Par
dons & langue une plus attractive. |
XCVI. |
Chef de Fossan aura gorge coupee, Par le ducteur du limier
& levrier: Le faict par ceux du mont Tarpee, Saturne
en Leo 13 de Fevrier. |
XCVII. |
Nouvelle loy terre neuve occuper, Vers la Syrie, Iudée
& Palestine: Le grand empire barbare corruer, Avant
que Phebés son siècle determine. |
XCVIII. |
Deux royals freres si fort guerroyeront, Qu'entre eux sera
la guerre si mortelle: Qu'vn chacun places fortes occuperont,
De regne & vie sera leur grand querelle. |
XCIX. |
Aux champs herbeux d'Alein & du Varneigne, Du mont Lebron
proche de la Durance, Camps de deux parts conflict sera si aigre,
Mesopotamie defaillira en la France. |
C. |
Entre Gaulois le dernier honnoré, D'homme ennemy sera
victorieux: Force & terroir en nomment exploré,
D'un coup de traict quand moura l'envieux. |